"તમારી પાસે રાષ્ટ્રનો ખજાનો છે, એને યોગ્ય દિશામાં લઈ જવાની જવાબદારી તમારા પર છે."
*****
"એકવાર અનાયાસે જ મને તન્વીની વાર્તા મળી ગઈ. મેં એને ત્રીજા ધોરણના બાળકોને બતાવી તો એમને ખૂબ મજા આવી." આ શબ્દો છે શ્રેષ્ઠ શિક્ષકનો નેશનલ એવોર્ડ જીતનાર નવા નદીસર- મસ્તી કી પાઠશાલાના રાકેશ પટેલના!
આજે ઇનોવેશન ફેર અંતર્ગત અમદાવાદ શહેર ડાયેટમાં રાકેશભાઈ સાથે બીજી વખત રૂબરૂ મુલાકાત થઈ. 'તન્વીના પપ્પા' તરીકે ઓળખાવું ખૂબ ગમ્યું!! આમેય દીકરી/દીકરા થી જ્યારે પિતાની ઓળખાણ થાય ત્યારે થતી ખુશી પિતા સિવાય કોઈ જ ન સમજી શકે! 2020 ના નવા વર્ષનો પહેલો જ દિવસ - 1-1-20 યાદગાર બની રહયો! ...અને એમાંય ખાસ ત્યારે કે જ્યારે રાકેશભાઈએ મને કહ્યું, "તમારી પાસે રાષ્ટ્રનો ખજાનો છે. એને યોગ્ય દિશામાં લઈ જવાની જવાબદારી તમારા પર છે."
તન્વી દોઢેક વર્ષની હશે અને ટેવ પડી ગયેલી કે વાર્તા સાંભળે ત્યારે જ ઊંઘે! મને ભયાનક ઊંઘ આવતી હોય અને એ મારા ઉપર આવીને પડે અને વાર્તા કહેવાનું કહે! ઘણીવખત એવું બન્યું છે કે વાર્તા કહેતાં કહેતાં હું ઊંઘી ગયો હોઉં અથવા તો ઊંઘમાં બીજું જ કશુંક બોલી જાઉં!
..અને એ એની નાની આંખોથી મને આશ્ચર્યથી ઊંઘતા જોઈ રહી હોય! બહુ જ જલ્દી એ બોલતા શીખી ગયેલી! એને કૈક કીધું હોય એ એને યાદ જ હોય! એવું ઘણી વખત બન્યું છે કે એકાદ વર્ષ પહેલાંની વાત પણ એને યાદ હોય! ..અને એ બોલે એ ફાઇનલ જ હોય, એમાં કોઈ ચૂક ન થાય!
પહેલી વખત એણે ચાલુ બાઈક પર કહેલું, "હું તમને એક વાર્તા કહું?" મેં હા કહ્યું એટલે એણે 'સમજુ બકરીઓ' વાર્તા કહી! ત્યારે એ માંડ ત્રણ વર્ષની હતી! "GUJARATI STORIES BY TANVI" યુટ્યુબ ચેનલ પર અત્યારે વાર્તાઓનો સ્કોર 60 પહોંચ્યો છે! જાણી-અજાણી જગ્યાઓએ રેકોર્ડ ના કરેલી વાર્તાઓ પણ જો ગણતરીમાં લઉં તો આ સ્કોર ૧૦૦ થી પણ ઉપર પહોંચે એમ છે! એને તાત્કાલિક વાર્તા કહેવાનું કહીએ તો એકેય વાર્તા યાદ ન હોય, પણ વાર્તા વિશે/શીર્ષક પુછીયે તો જવાબ મળે, "એ વાર્તા તો મને આવડે છે."
વાર્તા પોતાની રીતે બોલવાની સ્વતંત્રતા છે, પણ ક્યારેક અવળે પાટે ચડી જાય તો વાર્તામાં પણ વાર્તા કરી નાખે! પછી તો એને બોલતા પણ અટકાવવી પડે! આ દુનિયામાં એ ચોક્કસ કોઈ કામ નિશ્ચિત કરવા આવી હશે! ઈશ્વરને પ્રાર્થના કે એ જીવનમાં હંમેશા એવાં જ કામ કરે, એવાં જ નિર્ણયો લે જેનાંથી સમગ્ર વિશ્વ અને વિશ્વજનોનું ભલું જ થાય! ક્યારેય ગુલામ ન બને કે ન બેડીઓમાં જકડાય! વિશ્વચેતના એની સાથે હંમેશા જોડાયેલી જ રહે!
https://m.facebook.com/story.php?story_fbid=2597022383739308&id=100002947160151
ટિપ્પણીઓ નથી:
ટિપ્પણી પોસ્ટ કરો