તન્વીની વિચાર ડાયરી

*તન્વીની વિચાર ડાયરી*

*તન્વીની વિચાર ડાયરીનું આ પાનું, એવાં દરેક બાળકોને સમર્પિત.. કે જેઓ દરરોજ એમનાં મમ્મી-પપ્પાને આવા સમયે પણ પોતાની ડ્યુટી/કામધંધો કરવા ઘરની બહાર નીકળતાં જુએ છે.*

---------------------------------------   

"પપ્પા તમારા માટે સિક્રેટ છે." 

"બોલને બેન.. શું સિક્રેટ છે?"

"મમ્મીને કહેતાં નૈ.. એમનાથી છુપાઈને હું એક ડાયરી લખું છું. એ ડાયરી મારી વિચાર ડાયરી છે. મને જે પણ કંઈ વિચાર આવે એ હું એમાં લખું છું."

"એ તો બહુ સારી વસ્તુ છે. હું પણ મારી ડાયરી લખું છું. જો.." મેં એને ફોનમાં મારો બ્લોગ બતાવ્યો. થોડી વાતો પછી એણે એની ડાયરી બતાવી. એણે આજે શુ લખ્યું એ મેં વાંચ્યું. મેં કહ્યું, "હું આનો ફોટો પાડી ફેસબુકમાં શૅર કરું?"

"હા.. પણ મમ્મીને કહેતા નઈ.. આ સિક્રેટ છે."

મેં હા પાડી.

*****************************

જ્યારથી કોરોના ઘુસ્યું છે, ત્યારથી ઘરમાં ઘૂસવું અઘરું થઈ ગયું છે. (લોકડાઉનમાં જે લોકો ઘરે બાળકો-પરિવાર સાથે રહી શકે એમ છે, એમને કારણ વગર સોસાયટીનાં નાકે-દરવાજે આખો દિવસ ટહેલતા જોઉં, ત્યારે મને એમની ઈર્ષ્યા થયાં વગર નથી રહેતી! જેને રહેવું છે, એ નથી રહી શકતાં, અને જે રહી શકે એમ છે, એ લોકો બહાર આંટા મારે છે!!) સજ્જડ લોકડાઉનમાં પણ રેશનકાર્ડ દુકાનની કામગીરી, KYC ની કામગીરી અને હવે કંટ્રોલ રૂમની ડ્યુટીમાં આખું વેકેશન ગયું. માંડ અઠવાડિયું જ ઘરે રહી શક્યો હોઈશ. એમાંય ઘરની અંદર આવતાં પહેલાંની અને પછીની તકેદારી રૂપે મારી દીકરી તન્વીને મારી નજીક પણ નથી આવવા દેતો. એ અજાણતાં પણ નજીક આવે તો એને દૂર રહેવાનું કહું. આવું ઘણાં લોકો કરતાં હશે..

આપણાં બાળકો જ્યારે 'કોરોના મહામારી'માં આપણને ઘરની બહાર નીકળતાં જુએ છે ત્યારે શું વિચારે છે?? *તન્વીની વિચાર ડાયરીનું આ પાનું, એવાં દરેક બાળકોને સમર્પિત.. કે જેઓ દરરોજ એમનાં મમ્મી-પપ્પાને આવા સમયે પણ પોતાની ડ્યુટી/કામધંધો કરવા ઘરની બહાર નીકળતાં જુએ છે.*